Ordkrig

Eit ord er ei pil
Som flyger av stad utan stans eller kvil,
Du kan ikke vita kor vida det fer.
Det sårar din uven og den du hev kjær.
Eit ord er ein gneiste som kveikjer ein brann
Du sløkkja ei kan. (i)

Denne gamle salmen som me lærde på skulen då eg var liten, har vore i tankane mine siste tida.

Løgn er ikkje noko nytt

I bloggane datert 05. og 26.11.23 skreiv eg om «Løgnens regime». Det har fylgt mennesket frå skapinga av. For rundt 2 500 år sidan skreiv profeten Jeremias: «Sverd over lygnarane! Dei skal stå der som dårar. Sverd over kjempene hennar! (ii) Dei skal verta skremde». (Jer 50; 36). Den gongen var det dei som kalla seg profetar, men som ikkje var sende av Gud. Dei laug og spådde «siger» og «fred» i ei tid då Herren gjennom sine sanne profetar hadde lova krig og død om ikkje folket vende om. 

Kampen mellom sanninga og løgna ser me kanskje klårast i GT / Tanakh då Israel var delt i Samaria og Judea. Freds- og framgangsprofetiane vart aldri oppfylte. Derimot skjedde alt slik som Herren / Adonai hadde sagt gjennom sine profetar, endå både kongane og fleirtalet av folket trudde løgna. 

Ei løgn vert ikkje sanning, uansett kven eller kor mange som trur på ho!

Eit endetidsteikn

Skjermdump frå JPost på internett, 24.01.24.

Mykje av det som skal koma over jorda i det Bibelen kallar «Endetida», er ting som har vore ein del av soga til menneskja på jorda frå gammalt av. Slik og med løgn og eller halvsanningar som trekkjer konkrete fakta i tvil. Me såg det alt i Edens hage der Ormen kombinerte løgna si med å trekkja Guds Ord i tvil. (iii) 

Under fangenskapet på Patmos fekk apostelen Johannes sjå Lammet, Jesus, opna bokrullen og setja endetidsprosessen i gang. Ingen, utanom Gud, veit den nøyaktige timeplanen og når ting skal skje (iv), men Jesus sa til læresveinane sine at dei skulle sjå på teikn i tida, - og slik vita at slutten nærma seg (v). 

Det første Johannes fekk sjå då endetida vart rulla ut framfor han, var ein ryttar på ein kvit hest: «Og eg såg – og sjå: Ein kvit hest, og han som sat på den hadde ein boge. Og dei gav han ei krone, og han drog ut med siger og for å sigra.» (Op 6;2).

Om Jørgen Darre hadde denne ryttaren i tankane då han skreiv salmen, veit eg ikkje, men det er ingen tvil om at denne ryttaren rir gjennom verda og sender ut «pilar». Krona, teiknet på makt til å regjera, fekk han av «dei». Bibelen gjev ikkje noko svar på kven desse «dei» er, men det kan vera dei han hadde vunne og som har gått med han i striden? 

«- og han drog ut med siger og for å sigra», det vil seia at han fekk framgang og meir og meir makt.

Skjermdump frå JPost på internett, 25.01.24.

Mediaflaumen, eit endetidsteikn

Siste hundreåret har flaumen av informasjon vakse meir enn heile tida det har eksistert menneske på denne jorda. No er det ikkje berre ord som vert sende ut, men også bilete og lyd, og alt vert spreidd verda over, fortare og fortare.

Kanskje holkortmaskinene var første steget fram mot datamaskinene av i dag? I alle fall har me sidan hatt ei akselererande utvikling i både lagring og bruk av data. Telefonane var knytt fysisk saman gjennom eit nett av trådar, men kunne drivast av batteri. Radiobylgjene opna for trådlaus kommunikasjon verda over, og teleks og telefaks letta flyttinga av det skrivne ordet like fort og langt. Det same galt utviklinga av fotografi og lagring av bilete, frå Daguerrotypiet til dagens teknikk for bilete, fargar og lagring.

I dag har me over alt med oss ei minidatamaskin, mobiltelefonen, som kan gjera alt dette både fortare, finare og billegare. Me er stadig  på jakt etter noko nytt, og mediaflaumen tek større og større del av vår tid og vår evne til å absorbera ny kunnskap.

Informasjonsflaumen har enorm kraft. Propaganda og reklame er ikkje noko nytt, men begge har tilpassa seg alt det nye og utgjer ein større og større del av mediabiletet. Kven av oss tek ikkje opp telefonen når me har litt tid? Heilt frå tidleg barnealder er telefonen no ein av viktigaste portane til kunnskap og påverknad. Han formar tankesett og handlingsmønster, og har skapt det me kan kalla «influensar-industrien». Gjennom sin musikk, sine bilete og sine ord får «influensarane» konsumentane sine til både å gjera det dei vil, gjera dei innkjøpa dei reklamerer for, og i tillegg spreia media-«pilane» vidare til nye menneskje.

Kunstig intelligens og nye teknikkar skaper tekstar, bilete og lydar så vanlege folk ikkje kan skilja mellom det ekte og det uekte. Røysta vår, måten me snakkar og uttrykkjer tankane våre på, og bileta av oss, kan kopierast og omarbeidast så nøye at er uråd å skilja om det er eit levande menneske eller eit maskinprodukt. Falske nyheter, såkalla «fake news», utgjer ein stadig større del av informasjonsmengda, seiest det.

Mediakrig

Skjermdump frå JPost på internett, 31.12.23.

Jødehat, uansett kva namn det er pynta med, har som mål å skada og eller gjera ende på jødane og Israel. Golda Meir sa det: «Dersom me må velja mellom å vera døde og at folk synest synd i oss, eller å vera i live og at folk har eit negativt bilete av oss, så er det å leva med eit negativt bilete å føretrekkja». (vi) Dette var realiteten under det engelske mandatet då både jødar og arabarar der hadde pass og identifikasjonspapir som sa dei var «palestinarar», dvs. busette i området romarane og seinare engelskmennene kalla «Palestina». I dag er denne sanninga forvridd slik at arabarane i Israel vert oppfatta som «urfolk», og jødane som «inntrengjarar».

Det same gjeld realitetane bak og i krigen i Gaza. Media spreier bilete der vesentlege fakta er underslegne eller pynta på, bevisst eller ubevisst. Statar som Noreg med statsminister og utanriksminister, støttar opp om dette biletet så godt dei kan. Dette formar vanlege folk sitt bilete av jødar og Israel på same måten som propagandaen nazistane og andre jødehatande ideologiar produserte på 1900-talet.

«Tostatsløysinga» - ein dødsdom for Israel!

I går las eg at i områda på den såkalla Vestbredden viser ei meiningsmåling no at rundt 75 % av dei spurde støtta det Hamas gjorde 07.10.23! Hamas og Palestinsk Jihad i Gaza, Hizbulla i Libanon, Houtiane i Yemen og Iran sine undergrupper i Syria har alle sagt at deira mål er å drepa jødane og fjerna Israel frå kartet! Dette er dei «demokratiske kreftene» som USA og Noreg med fleire arbeider for skal få makta over store og sentrale delar av dagens Israel! 

Får tostats-tilhengjarane vilje sin igjennom, vil det blodbadet som Sør-Israel opplevde 07.10.23, berre vera ein dråpe i havet mot det som vil koma. Det trur i alle fall eg.

Er det det dei «Israel-vennlege» politikarane arbeider for?
                        
-------------

(i) Denne salmen vart skriven av biskop Hans Jørgen Darre i 1870, og omsett av Bernt Støylen i 1906. Denne teksten er slik du finn han i Salmebloggen (http://salmebloggen.no/2008/12/22/et-ord-er-en-pil/). (Merknad: «ikke» i tredje linje i verset verkar framandt for meg!)
(ii) Israel vert i det kapitlet omtalt som ei kvinne. Derfor «hennar».
(iii) «Då sa ormen til kvinna: De kjem slett ikkje til å døy! 5 Men Gud veit at den dagen de et av det, vil augo dykkar verta opna, de vil verta som Gud og kjenna godt og vondt.» (1M 3;4-5) Første delen var rein løgn, for med syndefallet kom døden inn i verda. Andre delen var ei halv sanning. Dei lærde fort kva som var godt og vondt, men der stogga og likskapen mellom dei og Gud!
(iv) Apg. 1,7.
(v) Luk. 21.5 – 36.
(vi) Mi omsetjing av «If we have to have a choice between being dead and pited, and being alive with a bad image, we’d rather de alive and have the bad image». Sitert i artikkel i JPost, 25.01.24. (Leitar du på internett, vil du truleg endå finna biletet der Golda Meir viser passet sitt frå før 1948. I det er ho «palestinar»!)
Merk: Bibelsitata er frå Norsk Bibel, nynorsk utgåve.


Det er ikkje lov å bruka tekst eller bilete frå denne bloggen uten skriftleg løyve frå meg.

 Tankar rundt krigen i Gaza. (Del 2.)

1. Største skilnaden på denne og tidlegare krigar, er bruken av tunellar

Største problemet for Israel er at dei dei kjempar mot, held seg under jorda. Kanskje Hamas skrytte då dei snakka om 500 km tunellar under Gazastripa, men etter det som Israel no har fått fram, så er det snakk om tunellar og infrastruktur til mange milliardar dollar. Konstruksjonane beviser fagleg kunnskap, dyktige ingeniørar (i) og tusenvis av arbeidarar som må ha jobba der nede under jorda år etter år. Enorme mengder sement, armeringsjern, kablar og røyrsystem til lys, vatn- og ventilasjon har vorte importert og nytta der nede. 

Skjermdump frå JPosts artikkel 04.01.24

Den største tunellen eg har lese om, munnar ut berre 400 meter frå Erez-porten mot Israel (ii). Han er 4 kilometer lang og ligg omlag 50 meter nede i jorda. Bygginga skal ha vore leia av veslebror til Hamas-leiaren, Tahya Sinwar. Ein Hamas-vido viser Sinwar når han køyrer ein liten jeep gjennom tunellen! Dette gjev oss ein ide om kva verdi desse tunellane har for flytting av våpen og personell utan at det kan registrerast oppå jorda.

Tunellinngangar er funne i privathus, i og ved offentlege bygg som skular og sjukehus, og tilsvarande gøymestader. Gjennom tunellopningane kjem terroristane fort til syne for å angripa soldatane, og går ofte bokstaveleg talt «under jorda» når Israel angrip dei.

2. Bevisst bruk av sivile som skjold

Ingen kan nekta for at Hamas gøymer seg med våpenarsenal, våpenproduksjonslokale og utskytingsrampar i, under eller nær institusjonar som etter det gamle paradigmet skal vernast i ein krig. (iii) 

Tunellane gjer og at når Israel har rydda eitt område, kan terroristane flytta våpen og utstyr og skyta raketter frå nye stader, - då ofte frå stader som Israel har sett av som «trygge» for dei ikkje-stridande. For å stogga rakettane må Israel bomba utskytingsrampane. Dette fører til at uskuldige menneske døyr, og det visste Hamas då dei starta skytinga. Israel derimot har brukt «skremsle-bomber» og flygeblad for å få sivile til å rømma før sjølve åtaket. Dette er gjort nettopp for ikkje å drepa eller skada uskuldige.

Skjermdump frå artikkel i "The Times of Israel" 08.01.24 om kva «tunellkrig» er.

  3. «Proporsjonelle» tapstal?

I media møter me stundom informasjon som kan samanliknast med ei gammaldags brevvekt. Ho fungerte ved at ein fekk jamvekt i begge vektskålene. Media gjer det same når dei snakkar om «proporsjonelle» tal på døde i Israel og Gaza. (iv) 

Eg tenkjer ofte på kor mange menneske som vart drepne 07.10.23, og kor mange menneske som er drepne i Gaza etterpå. Det er grufullt! Men jødane som vart drepne den dagen, levde i fred då åtaket kom. Dei som vert drepne i Gaza, døyr fordi Hamas gøymer seg mellom og under folket dei vart valde til å styra og verna. Hadde terroristane stått fram som ein normal hær, ville folket i Gaza lidd minimalt, og krigen hadde vore over på kort tid. Det er derfor ikkje Israel som kan skuldast for folkemord. Skulda ligg hjå Hamas både for 07.10.23, og for det som har skjedd på Gazastripa etterpå.

Samanliknar me sivile tapstal i Afganistan og Libya pr. bombe, er tapstala minimale i Gaza. Eg såg ein statistikk på dette for ei tid sidan. Tap i Gaza er berre nokre prosent av det tilsvarande talet på døde pr. bombe i dei krigane der også Noreg deltok. Og Israel har gjort meir for å spara sivile liv enn nokon annan krigførande nasjon tidlegare. Men er ICJ (og verda elles) villig til å erkjenna det?

4. Reelle tapstal

Skjermdump frå Israel/Gaza-krigen: Kart og grafikk (vg.no)

Du hugsar vel al-Ahli Arab-sjukehuset som Hamas sa Israel hadde bomba og at der var 500 døde? Satelittbilete viste seinare at det var ein rakett frå Gaza som gjekk feil og slo ned i bakgarden på sjukehuset der mange hadde søkt ly. Sjølve sjukehuset var uskadd, og det vart offisielt registrert 50 døde. Altså 10 %. Det er sagt at statistikken i Gaza er svært usikker, med det er vel lite truleg at feilmarginen er så stor som i oppslaget om nemnde sjukehus?

Dei som har studert statistikken, seier at der er få døde i den aldersgruppa som terroristane høyrer til, men derimot unormalt store tal på døde barn, kvinner og eldre. 

Israel har eit visst oversyn over kor mange terroristar dei har drepe, men dei høyrer ikkje heime i statistikken over døde sivile. Mindreårige som er barnesoldatar eller arbeider i lag med kvinner og eldre menneske som informantar, er nok med. Kor mange det er snakk om, er uvisst, men som aktive informantar i terrornettverket til Hamas, skulle dei heller ikkje teljast som «døde sivile».

5. Mediakrig

Krig har alltid hatt stor plass i nyheitene, men aldri har informasjon vorte spreidd så fort og i så store mengder som no. Data og mobiltelefon er allemannseige. Det som vert spreidd slik, påverkar meir og meir tankegangen til oss alle. «Influensar-industrien» som eg kallar han, er eit tydeleg bevis på kva makt media har.

Bilete frå "The Times of Israel" 06.01.24 som viser resultatet av mediakrigen

Hamas har brukt og brukar desse media og spreier store mengder halvsann og falsk informasjon. Eit godt døme på dette er det før nemnde sjukehuset som ikkje vart bomba, men som likevel brende seg fast i minnet hjå mange, og som no derfor dømmer Israel for «folkemord». Israel brukar meir tid på å kontrollera at det dei offentleggjer, er rette og kontrollerbare data. Dermed kjem dei for seint og må bana seg veg i eit medielandskap som motparten alt har sett sitt preg på.

Dermed er ideen om «dei stakkars fattige palestinarane» som kjempar mot «mektige Israel» grodd fast, og statistikken over døde «sivile» i Gaza vert godteken uten kritiske spørsmål.  At dette formar folkeopinionen som til dømes i vårt land, er ingen tvil, men greier juristane i Haag å sjå gjennom «medieskodda» og sjå «landskapet» krigen føregår i?

6. Kvifor all den bombinga i Gaza?

Det veldige nettverket av tunellar knytte til bygningar over jorda, må destruerast. Det finst ingen annan måte å få terroristane opp i dagen og få øydelagt våpenarsenal, produksjonsstader for rakettar m.m. som Hamas har der nede. (v) Mykje av den bygningsmassen som Israel må øydeleggja for å nå Hamas der nede, er solide betongbygg, i mange tilfelle konstruerte for å tola jordskjelv. Av den grunn må Israel bruka enorme mengder dynamitt og bomber både over og under jorda for å nå målet.

Denne nye forma for krigføring gjer også at oppattbygging av Gaza etter krigen, vil møta større og andre problem enn oppbygging etter tidlegare krigar.

Konklusjon

Skilnaden på krigen då FN og ICJ vart grunnlagt, og det som føregår i Gaza i dag, er enorm. Ei rekkje av dei kriterium, definisjonar og prinsipp som vart lagt til grunn etter andre verdskrigen, er utgått på dato. Dei er ikkje relevante lenger. Dette krev nytenking, både når det gjeld måten krigen vert driven på, bruken av sivile som skjold, og som «ammunisjon» i den stadig viktigare krigen i media. Forståinga av kven som er «sivile» og «soldatar» må redefinerast av den enkle grunn at dei ikkje samsvarar med realitetane.

Den forma for krig som Hamas driv, er så ulik tidlegare krigar at det juridiske grunnlaget for ICJ og verda sin tradisjonelle måte å definera krig på, krev for ein grundig gjennomgang av både kriterium, definisjonar og lovparagrafar.  

Til ettertanke (vi)

Jesus sa: «Alt de vil at andre skal gjera mot dykk, skal de òg gjera mot dei. For det er dette lova og profetane seier.» (Matt 7;12)

Talmud, Shabbat, 31a:  «Gjør ikke mot din neste noe du ville mislike dersom det ble gjort mot deg. Dette er hele loven. Resten er kommentarer.» 

Koranen, 2:279: «Dere skal ikke gjøre urett, men det skal heller ikke gjøres urett mot dere.» 

---------------
(i) «Israel Today» har ein artikkel 09.01.24 om største våpenfabrikken IDF har funne til no. Han låg i tunellsystemet under Khan Yunis. Der laga dei mellom anna rakettar som kunne nå Tel Aviv.
(ii) Du kan lesa meir om denne i «Jerusalem Post», 04.01.24, under tittelen «IDF gives «Post» a look inside Hamas largest terror tunnel in Gaza».
(iii) Dette er for meg eit av bevisa på at den gjeldane «folkemordkonvensjon» er utgått på dato, og at paradigmet den byggjer på, må reviderast.
(iv) Tenk på andre verdskrigen då 6 000 000 jødar vart drepne av tyskarane. Ikkje noko normalt menneske vil seia at «det er proporsjonalt rettferdig» om jødane får drepa 6 000 000 tyskarar? 
(v) Nazisane drap jødar med gass som var tyngre enn luft, så ved å bruka same eller liknande gassar, kunne Israel spart mykje av bombinga. Men bruk av slike gassar er ulovleg og vert reknar som krigsbrotsverk. Dessuten er – så langt me veit, gislane også gøymde i tunellane.
(vi) Bibelsitatet er frå Norsk Bibel, nynorsk utgåve. Dei to andre sitata er frå https://no.wikipedia.org/wiki/Den_gylne_regel
---------------

Det er ikkje lov å bruka tekst eller bilete frå denne bloggen utan skriftleg løyve frå meg.

 Tankar rundt krigen i Gaza   (Del 1)

I desse dagar startar rettargangen mot Israel i den internasjonale folkerettsdomstolen i Haag (ICJ).  Med utgangspunkt i Israel sin krig mot Hamas (i), har Sør-Afrika (ii) klaga landet inn for denne domstolen. Når du les det eg sit og skriv, vil media vera full av stoff om rettssaka i Nederland.

Eg prøver å analysera det eg veit om denne krigen, og prøver å koma fram til ein konklusjon. Om dette interesserer nokon andre enn meg sjølv, veit eg ikkje, men eg skriv no likevel. Eg ber deg ikkje å vera enig med meg. For min del kan du gjerne «surfa» vidare….

Skjermdump frå "Jerusalem Post" som viser video frå krigen.

Krigens paradigme

Begrepet «paradigme» vert brukt i vitenskapen, men eg er frimodig nok til å overføra det på justis og lovverk. Eit paradigme er ein viss måte å forstå kunnskap på. Denne tolkinga av kunnskapen skaper presedens for måten ein tolkar nye ting. Ny kunnskap vert «lesen» gjennom det gamle paradigmet sine briller, og tilhengjarar av det gamle paradigmet viser normalt motvilje mot nyare forsking og fakta som kjem i konflikt med «deira» paradigme.

FN og ICJ vart fødd i etterdønningane av den andre verdskrigen. Då hadde landa ført krig mot kvarandre både på landjorda, i lufta og på havet. Ut frå det vart det laga etiske retningslinjer og lovar for krigsbrotsverk. Det er dei Israel no må forsvara seg mot. 

Spørsmålet mitt er om dei vurderingane som vart lagde til grunn då domstolen vart etablert i 1945 (iii), er tilpassa krigføringa anno 2023/24. Krig 1939-45 var svært ulik krigar som føregår no, og måten terroristane i Gaza fører krig på, er endå fjernare frå den forståinga av krig som rådde den gongen. Det er denne nye forma for krig Israel må svara på når dei skal eliminera Hamas og terroristane som valdtok og drap i Sør-Israel 07.10.23. 

«Landskapet» ICJ skal orientera seg i i denne rettssaka, samsvarar derfor ikkje med det «kartet» dei fekk å orientera seg etter då domstolen vart oppretta. Skilnadane er så store at det må tvinga fram nye måtar å definera krig. Slik ser det i alle fall ut for meg som meinar tida er moden for eit paradigme-skifte. 

Her kjem det eg meinar er viktige element i denne vurderinga:

1. Kven er ein flyktning?

Flyktningar finst mange stader i verda. Normalt vert flyktningar integrerte i sitt eige land (iv) eller i eit land som tek mot dei, innan få år. Derfor er det unikt at «palestinarane» har hatt flyktningestatus i 76 år. Samanlikna med andre stader i verda, skulle «flykningeleirane» i Israel og Gaza vore vekke for lenge sidan.

Etter vanleg tankegang er ein generasjon 25 år. Folket i Gaza og på «Vestbredden» har arva statusen og med den støtte til livsopphald frå verdssamfunnet i 3 generasjonar. Kor lenge skal dei få denne ha spesialhandsaminga? Evig?

Eit media siterte for ei tid sidan ein Hamasleiar slik: «Det er ikkje vårt ansvar å fø flyktningane i Gaza eller garantera for deira tryggleik. Det er FN sitt ansvar». Korleis kan FN godta dette når Hamas formelt gjekk til val og tok makta i Gaza i 2007? Har dei ein bindande avtale som seier at FN (og mellom anna Noreg) skal fø og verna folket i Gaza så dei sjølve fritt kan bruka pengar og krefter på å drepa jødar, samla våpen og byggja tunellar?

Skjermdump som viser Hama-plakat med barnesoldat. (JPost 05.01.24)

 

 

2. Kven / kva ein «soldat»?

Då ICJ vart oppretta, var ein «soldat» ein stridande på landjorda, i lufta eller på sjøen og som gjekk i uniform. Uniforma vart lagt til grunn for det juridiske skiljet mellom kven som var stridande part i ein krig, og kven som vart klassifiserte som sivile.  Mindreårige, kvinner (utan uniform) og gamle vart automatisk rekna som «sivile». Dette skiljet er ubrukeleg i den krigen Israel er oppe i. Om ikkje ICJ tek denne nye kunnskapen med i vurderingane sine, gjer dei ein blodig urett mot Israel (og kven som helst elles i verda som må forsvara seg mot tilsvarande terrorgrupper).  

Israel har funne kommandorom med datamaskiner og tusenvis av dokument og videoar som Hamas sjølv har laga. Eg har skrive før om skulane til palestinarane som spreier jødehat og oppfordrar til drap av jødar. Det nye er no at Hamas har organisert sommarleirar på linje med sommarleirar elles i verda. Men der er ikkje leik og positiv kunnskap borna har fått. Det er trening til å drepa jødar!

Ein Hamas-film viste gutar (for meg såg dei ut til å vera frå 12-årsalderen og oppover) som låg på kne og dreiv vedlikehald på våpna sine. Å ta sund, kontrollera, rensa og smørja våpen, er normal opplæring av rekruttar i alle land. I Gaza har det altså vore sommarleir-aktivitet for born! Desse barnekrigarane kan dermed ikkje klassifiserast som «born» og «sivile», men som soldatar og er dermed lovlege mål i krigen, - uansett alder. Dei hadde heller ikkje uniformer...

Skjermdump frå "Jerusalem Post" 10.01.24

Terroristane, slik me har sett dei ved overlevering av gislar og ved mottak av hjelpesendingar, er uniformerte og har synlege våpen. (v) I Gaza dukkar dei opp frå ukjende tunellmunningar og angrip jødiske soldatar, eller går mellom folk utan uniform. Dei brukar og baggar merkt UNRWA til transport av våpen og ammunisjon. Israel fiendar er dermed til tider «soldatar» utan tradisjonelle og synlege kjenneteikn som våpen og uniform. (vi) 

3. Spionar eller «informantar»

Å skaffa informasjon er viktig. I krigen som føregår i Gaza, er born, kvinner (utan uniform) og eldre terroristane i sine auge og øyre oppå jorda, og som orienterer terrorisane i tunellane kva Israel held på med til ei kvar tid.

Desse, som ut frå tradisjonell tankegang er «sivile», er ein aktiv del av Hamas. Dei er dermed lovlege mål i krigen. For å ha best mogeleg informasjon må dei halda seg nær dei israelske styrkane. Dei kan derfor heller ikkje røma til dei sonene som Israel har sagt er «trygge», skal dei gjera jobben sin.

(Framhald neste søndag).

----------

(i) Eg brukar her ordet «Hamas» i vid forstand, dvs. eg puttar alle terroristgruppene som angrip Israel i same "sekken". Hamas er den største og er rådande i Gaza. Dei «tok æra for»  åtaket 07.10.23, men også andre terroristar var med. Me finn slike terroristar i Gaza, på Vestbredden, i Libanon, Yemen og Syria.
(ii) Israel underskreiv ICJ-konvensjonen som nyoppretta stat i 1950. Sør-Afrika først i 1998, - 48 år seinare. I det eg har sett i media, rettar Sør-Afrika einsidig fokus på Israel sin forssvarskrig, ikkje på det Hamas gjorde i Israel 07.10.23. Dette kan lesast som ein indikator på kva motivet til Sør-Afrika er.
(iii)  Det er desse vurderingane som eg kallar krigens «paradigme».
(iv) Det naturlege ville vera at dei såkalla «palestinarane» fekk plass på den delen av Balfourdkartet som i dag er kongeriket Jordan. Det er ei mykje meir rettferdig deling enn at arabarane først fekk mykje over halvdelen av det originale området, og no vil tvinga til seg store delar av det området jødane vart lova og som Folkeforbundet / FN sa var deira. Det originale kartet gav Israel alt frå Hermon og Golan til Egypt si grense, og frå Jordan til Middelhavet.
(v) Dei same ytre kjenneteikna brukte Yasir Arafat både Oslo i 1994, i FN og Washington. Han gjekk i uniform og hadde revolveren i beltet.
(vi)  10.01.24 hadde Jerusalem Post ein stykke om 3000 UNRWA-lærar som lovprisar det som skjedde 07.10.23.  
--------------

Det er forbode å bruka bilete eller tekst frå denne bloggen utan skriftleg løyve frå meg.

Med nye ark og fargestifter til

Guds "farjestifter"...

Alf Prøysen (1914-1970) song om guten som gjekk «og gret og var så lei…. Men så hørte han et sus som over furukrona kom:

      Du skal få en dag i mårå som rein og ubrukt står
      Med blanke ark og farjestifter tel.
      Og da kæin du rette opp att æille feil i frå i går
      Og da får du det så godt i mårå kvell.»

Kan du tenkja deg ein betre start på den nye året enn dette: «Rette opp att æille feil» som vart gjort i 2023, og så starta januar 2024 «med blanke ark og farjestifter til»?

Eg vaks opp i skogkanten, og kanskje nett derfor var det mor brukte ordtaket: «Det er brotne greiner i alle skogar». Det var ikkje skogen ho tenkte på, men at uansett kor fint og flott ting kan sjå ut, finst det alltid noko som ein gjerne vil at ingen skal sjå.

Dette ordtaket har vore i tankane mine av og til. Du som les bloggen min, veit at eg er negativ innstilt til mykje av det som kjem fram i dei fleste media, til organisasjonar som marknadsfører seg som nøytrale hjelpeorganisasjonar, men ikkje er det, - og til Noregs utanrikspolitiske kurs no for tida.

«Leger uten grenser»

Eg har før skrive at ut frå det me ser i Gaza, er det kanskje ikkje er landegrenser namnet referer til, men etiske grenser.  Ein som ofte har vore i Gaza, rosar Hamas for sitt «mot». At terroristar som brukar kvinner, barn og sjuke som skjold, er det bevis på «mot»?

Hamas angreip jødar i Israel 07.10.23. Mellom ugjerningane var gruppevaldtekt av mellom anna kvinnelege soldatar. Valdtekter så brutale at bekkenbeinet vart øydelagt, er konstatert. Også tilfelle der kvinna vart drepen med skot gjennom vagina. Er slikt «modig gjort»?

«Røde kors»

Noreg er inga fredsdue!

Eg har i alle år sett denne organisasjonen høgt, men det glansbiletet har bleikna. Eit av gisla frå Gaza fortel at under fangenskapet fekk ho kontakt med ein representant frå organisasjonen, men dei ville ikkje hjelpa. Israel bad "Røde kors" vitja gislane, men det gjorde dei ikkje. Netanyahu ville levera livsnødvendige medisinar til gislane gjennom «Røde kors», men dei nekta å ta imot.

På TV under fangeutvekslinga såg me derimot at samarbeidet med Hamas og Islamsk Jihad, var velfungerande. Det same gjeld hjelpesendingane dei tek mot til folket i Gaza. Folk i Gaza får lite mat fordi ein stor del av hjelpa «går ned i tunellane», - seier dei oppå jorda.  Korleis kan «Røde Kors» då marknadsføra seg som «politisk uavhengig hjelpeorganisasjon» når dette er realiteten?

Feilslegen utanrikspolitikk

Dei som styrer Noreg no for tida, trur dei er supermenn i konfliktløysing, ser det ut til. Me såg det overfor Taliban, og no overfor Hamas. Tostatsløysinga, ideen bak både «Osloavtalen» og andre avtalar, er ubrukeleg i arbeidet for fred  i Midtausten. Korleis kan palestinske styresmakter arbeida for fred når dei offisielt rosar angrepet  07.10.23? Kva politisk endring kan me venta når over 2/3 av dei spurde i ei meiningsmåling på «Vestbredden» seier dei støttar det Hamas gjorde?

«Mea culpa!»

I Paraguay er folk flest katolikkar. Dei går til skriftesstolen, bøyer sine kne og fortel presten om synder og sorger som tyngjer dei. Bak gitteret sit ein som høyrde på, gjev råd og øver sjelesorg. Når han eller ho angrar og seier «Mea culpa», får dei absolusjonen eller tilgjevinga i Jesu namn.  Den ærleg og angrande syndaren får gjennom dette ein ny start.

Kanskje eit slikt «skriftemål» kunne hjelpa både hjelpeorganisasjonane og norsk utanrikspolitikk og byggja tillit til det dei driv med?

Kva så med terroristane?

Me treng alle eit ankerfeste...

Dei fleste var unge menn har vakse opp i eit skulesystem der drap av jødar er glorifisert. Dette skjer gjennom skulemateriell og undervisning finansiert av pengar frå m.a. Noreg. MIFF har mange gonger påpeikt dette, stort sett til inga nytte.

Pengar, også frå Noreg, går til «lønn for drap». Dei som drep jødar, vert heltar og får løn frå dei palestinske styres-maktene. Den som tek livet av mange jødar, får ofte ei gate eller ein plass oppkalla etter seg. Alt dette er offentleg kjent stoff, men korkje norske styresmakter eller andre har vist reell vilje til å gjera noko med. Burde ikkje dette og kvalifisera for eit «Mea culpa»?

Eg vil slutta denne «jeremiaden» min med eit Gudsord:

«Den sjuande engelen bles i basunen. Då høyrdest det i himmelen røyster som ropa høgt: «Herredømet i verda høyrer no til vår Herre og den han har salva, og han skal vera konge i all æve.» (Åp 11:15)

Det kjem ei tid, - når veit eg ikkje, då han som julefeiringa skulle vera til minne om, tek over all makt på jorda. Då kjem dommen over nasjonane (og organisasjonane?) (Matt.25).

Dette gjev oss von for framtida, uansett om me er jødar eller ikkje….

-------------- 

Som normalt er bibelsitatet frå Norsk Bibel, nynorsk utgåve.

Det er ikkje lov å bruka bilete eller tekst frå denne bloggen uten skriftleg løyve frå meg.